Ihr braucht Eich goar net schäbb ze lache!
Schun lengschd hot mers jo feschgeschdellt! -
Un dodrou is aa nix ze mache:
Es schennschde Plätzel uffde Welt
Is Bensem - soll ich's Eich beweise?
Baßt, wanns aa net groad leiht in Preiße,
Doch goar nix iwer Bensem gäiht.


Wer will oab däs dischbediere:
Vun alle Weltdaal, die wus gitt,
Duht doch Eiroba vorn maschiere,
Weils do kaa schläächte Sache gitt.
Do hupft kaan Aff aam wild engäje,
Kaan Läib un aa kaa Känguru,
Kaa giftgi Schlan duht uff sich blähe -
Mer läbt in Ruh - däs gibschde zu!

Un vun Eiroba - nor net hufe -
Is Deitschland doch de Middelpunkt!
Es isses als noch - uberufe -
Wanns aa mol woar in Dräck gedunkt. -
Schun duhts allmehlich sich erhewe,
Mer sichtsem ball schun net mäih ou.
Mer werrn däs all noch mol erläwe,
Daß Deitschland wirrer owedrou.
Vum Deitsche Reich im woarme Siede
Als Perl moi Hesselendche prangt.
Vun Persching - un vun Ebbelbliete
Isses im Friehjoahr dicht umrankt.
Do woachse Mannele, Abrigose,
Gedeiht de Woi - wie Honig sieß;
Do gitts die dickschde roure Roase.---
Korz - Hesse is e Paradies!

In Hesse, her ich will ders weise,
Do leiht die Bäigstroaß, braat un lang;
Mer duhtse in Gedichte preise,
Ehrn Noame horren guure Klang.
Der wuse kennt, der hots gesehe,
Daß Bensem leiht do mette droi
(Es hilft kaa Leihn; und Verdrehe)
Als wieen groußer Edelschdoi.

So häwwichs korz Eich jetzt bewiese,
Woas ich Eich lang beweise wollt.
Wies Aamolaans vum Adam Riese
En jeerer Mensch däs wisse sollt:
Es gitt aa Bensem, nor däs aane.
Däs is de Welt ehrn Sunneschoi

E zwattes konn mer higschdens ahne.
Un däs, däs leiht im Himmel.

Es is hoalt sou!
Räig Dich net uff, daß annern Leit,
Wie du, net schaffe misse.
Sou woars doch schun zu jeerer Zeit.
Däs kennschde längschd doch wisse.

Däs Dischpediern hot do kaan Zweck.
Sou isses hoalt im Läwe. - -
De Aisel tregt die Malderseck,
De Treiwer reit denäwe