Die Endeckung vun Amerigga

Columbus woar aus Genua
Un hot endeckt Amerigga.
Däs wisse manchmol als noch Leit
Aus ihrer Schul- un Jugendzeit.
Aach, dasse Aik, der grouße Held,
Zwoar net geleggt - doch ufsgestellt. - - -
Woas domols sunschd noch is bassiert,
Häwwich do sauwer uffnodiert.
Sou wisses aa noch annern Leit
Un 's kimmt net in Vegessenheit.
Zu dere Zeit woar däs Besträwe
Zu soi, wu wille Velker läwe
Un ganz besunnerschd Indie woar's,
Wu all gestäckt hot inde Noas.
Ob reich mer is, ob nah am Dalles,
Noach Gold do drengt un sehnt sich alles.
Un weil däs Indie woar voll Gold
Drum hot aa jeerer higewollt. - -
Columbus secht zu soiner Fraa:
„Woas annern kenne, konn ich aa!“
„Ich wollt“, secht druff soi Ooald un krächst,
Du weerschd schun, wu de Peffer wechst!“
Columbus denkt „der äbschde Drache
Hot Räächt, ich werr noach Indie mache.
Ich fill moin Beidel dort mit Geld
Un werr beriehmt noch uff de Welt!“ - -
Columbus hollt soin Kompaß her
Un denkt, „däs schoint mer net zu schwer.
Ich glaab, es iſses allerbeschde
Ich mach mol kerzegroad uff Weschde.
Is rund die Erd, wie ougenumme,
Muß ich bestimmt noach Indie kumme,
Ich häbb kaa Zeit mäih ze veliern,
Um moin Enschluß ball auszefiehrn,
Eh daß noch Aaner vor mer kimmt

Un mer de ganze Räwwach nimmt.“ - -
Mit dene fremme Menscherasse
Is freilich oft net lang ze spasse.
Die Kerl sinn grouß un staik wie Bäärn
Un häwwe aam zum Fresse gäärn.
Ihr Lieb gäiht meischdens dorch de Moage
Drum gäihts aam leicht als an de Kroage,
Wammerse vorher net noch dabbt
Un jeerem dichdig aani babbt.
Un wie Columbus däs bedenkt
Horrer im Geischd poar uffgehenkt.
Er hot betroacht däs als soi Pflicht
Als guurer Bäjer un als Chrischd. - -
De Ferdinand, die Isabell
Nenn ich jetzt do an erschde Stell.
Die hot Columbus ougestumbt
Un hot sich vunnen Geld gebumbt.
Däs Geld däs horrer oigesackt
Un for die Reis soin Kroam gepackt.
Drei Schiff die horrer sich gekaaft
Un alles sauwer druffgeschlaaft.
Soi Leit -groad net die beschde Kunne
Häwwe die Schiff jetz oabgebunne
Un mirreme kräftige „Ahoi!“
Do schiffese ins Meer enoi. - -
Ball macht en mancher schun soi Glosse:
„Dem glaawich nix, däs sinn sou Bosse
Un meer, meer werrn die Dumme soi
Do bei de „Foahrt ins Blaue noi.“ - -
Mim Esse fengts ou knapp ze werrn,
Die Sunn, die brennt aam schäi uffs Herrn.
Die Zwieback sinn lengschd uffgegesse
Zuletschd do muß mer Ratte fresse.
Un wammer wu e Mick vewischd,
Die werd als Broare uffgedischt.
Columbus is jetz ganz geknickt
En Storm bricht lous als wie verrickt.
Aus Angschd duht alles do vezage

Am Enn do will mer'n noch vehaage.
„Drei Doag noch!“ secht Columbus druff,
Dann kehrn mer um un steckes uff!“ - -
Schun woarn die beinoh rumgegange,
Do hot mer'n Baamstamm uffgefange,
Un aach voll Beern en grouße Aschd.
Es flarrern Veggel um de Maschd,
Uff aamol blizt wu uff e Licht,
Do brillt's vun iwweroall: „Land in Sicht!“
Allmehlich isses uffgedaucht,
Groad 70 Doag hot mer gebraucht,
Bis mer den Wäh zerickgeleggt
Un sou e neii Welt endeckt. - -
Es Schläächde leicht mer doch vegißt!
Mer hot Columbus jeg vekißt
Unen getroage uff de Hend. - -
Sou rasch hot sich es Bload gewendt.
Der secht un schmunzelt:
„Seht Ihr Leit Zum Ziel fiehrt nor Beharrlichkeit!“ - -
Die Schiff die fehrt mer uff de Sand,
Un macht in aaner Fraad uffs Land.
Die Musik speelt jetz en Choral,
Die Wille denke sich ehrn Daal.
Sie gucke schääl sich ou un lache:
„Duht uns nor schäi mol Musik mache.
Doch häww'mer satt mol Eier Bosse,
Do kennter haam Eich geihe loſſe. - -
Ihr Lache legge unser Leit
Nor aus als puuri Froindlichkeit.
Se sehn jetz Goldblech beien blinke,
Glei duhnse friedlich her se winke
Un gäwwen dodefor aus Gloas
En Ring fors Ouhr un for die Noas.
Sou hot mer glei se ougeschmiert
Un däs genennt „zivilisiert.“ - -
Die Wille fange ou ze brumme,
Columbus leßt e Fässel kumme
Voll Branntwoi un leßt ruhig se trinke,

Bis steif se uff de Borrem sinke.
Nor poar däs iwwerstanne häwwe,
Die annern häwwe uff druff gäwwe
Ihrn Geischd, weil stäiker offeboar
De Woigeischd vum Columbus woar. - -
Noachdem mer se sou oigesaaft
Hot mer „Indianer“ se gedaaft,
Weil mer geglaabt noch vor de Hand,
Daß mer in Indie weer gelandt. - -
Doch ball woar mer sich driwwer kloar,
Daß däs en neier Weltdaal woar. - -
Kaum woar in Spanie däs bekannt,
Do woar mer ganz aus Rand un Band.
Uff aan Schloag woar de gräischde Held
Columbus von de ganze Welt.
Un doch hot däs vehinnert net,
Daß speerer mer en anrer Kett
Hot ins Gefengnis oabgefierht
Weilen poar Neidseck denunziert.
Mer sieht, wie's oft im Läwe gäiht
Däs bleibt sou lang die Welt bestäiht:
Die sinn betrooge dorch die Bank
Wu speerer rechne mol uff Dank.
Aach Ihr kennt's hinner de Spiejel stecke
Wu woas erfinne un endecke.
Es Schicksaal vum Columbus is
E warnend Beispiel do gewiß.
Drum bleibt dehaam bei Eirer Fraa
Un peift - - uff ganz Amerigga.